فیریشته
داود اهری
یورغون_آرغین شه هه رین توتقون هاواسیندان تله سیک اؤزونو ائوه یئتیریرسن. پریشان فیکیرلر و گونده لیک چکیش-برکیش‌لر سنی آیاقدان سالیب. بوتون وجودون قیشقیریقدیر آمما سسین چیخماییر.
سس سیزجه پیلله‌لردن ائنیرسن تا ائو صاحیبی آیاق سسیوی ائشیتمه سین. یئنه زئرزه مینین اجاره پولو دالی دوشوب.ائوده صندل اوستونده اوتورورسان.بیرآز یورغونلوغو آلیرسان.سونرا قالخیرسان و سو قابیندان بیر لیوان سو ایچیرسن.اؤزونه دئییرسن گره ک نئیله مک؟ بیر سیگارئت یاندیریرسان و فیکره دالیرسان.ته زه یادووا دوشور.همیشه کی ایش.پالتارلارو سویونورسان. یئر اوزونده اوتورورسان .گؤزله رو یومورسان. یاواش-یاواش گؤزله رو قاپاغینین آرخاسیندا دونیانی کهکشانلاری ایلا و اولدوزلاری ایلا تصور ائله ییرسن. آه ! نه قدر بؤیوکدور. سونرا گئتدیکجه بؤیوکلوگوندن قورخورسان و ایشین سونوندان. بو بؤیوک دونیا و بوتون انسانلار اولاجاقلار و سن داها اولمایاجاقسان. سانکی اوشویورسن. سویوق بوتون وجودوندا گزیر.
گؤزله رو آچیرسان. گؤز یاشلارین آخیر و سن دینجلیک دویورسان. ائله بیل دونیانین بوتون چتین لیک‌لری سنه آسان اولوبدور. بوتون مشقت‌لرین سونو. خوشلوق و لذت دویورسان.
گولورسن و اوره یینده بیر خیرداجا قورخو ایلا دوداق آلتی دئییرسن:بیز هامیمیز قورتولاجاغیق. اؤلوم فرشته سی بیزیم هامیمیزی قورتاراجاقدیر. اؤلوم فرشته سی . . . !ایندی یالنیز یاشاماق گره ک. یاشاماق گره ک. . .
اهر-29/10/84
داود اهری