گلین آپاریللار 

  فرانک فرید

• گلین آپاریللار!
• فرانک فرید

ائو-ائشیک آدینا

      آپاریلدیم

             ائشیک‌سیز ائوه، کشیک! 

            ***

...

گؤزللشدیک­جه گؤزلریم سولانیر

قاماشیر گؤزلریم، قاشلاریم آلیناندا

اورگیمین بندی قیریلیر

                        اوزومه بند سالیناندا

بویون باغی آلینیر، من آلیناندا!

کفن‌دن دئییلیر

               گلین­ دونو گئینده،

بوغازیم گؤینه­ییر

            بارماق دولو بال یئینده!

اوزومده قیزاریر

         قیزلیغین قیرمیزی آلماجیغی،

باشیما اله‌نیر

            قندین قوندارما شیرین‌لیغی.

بارماغیما حلقه تاخیلیر،

قولوما دستبند

     گئچمیشدن آنیلان قول­باغی،

یوللاندیریرلار:

                الی حنالی-

                         بئلی باغلی.

بیر ایینه- بیر ایینه

            تیکیلیرم تخته،

                   بخت  دئیه، دئیه؛

                              آپاریلیرام بو گئجه،

                                          ائو-ائشیگیمه.